Myanmar Roman Catholic hotuin sakhaw hmun bei lo turin ngen

Myanmar rama Roman Catholic kohhran hotu, Cardinal Charles Maung Bo an rama tualchhung buaina thleng mekah sakhaw biakna hmunte bei lo turin a ngen.

Tun hnaiah Myanmar khawchhak lam, Shan leh Kaya state border-a Myanmar sipai leh helpawlte an inbei nasa hle a, sipai leh hel lam pawh mi eng emaw zat an thi nia sawi a ni.

Inbeihna thleng vangin tualchhung mi eng emaw zat chu himna zawngin sakhaw biakna hmunah an tlanchhia a ni. Hetih lai hian tlanchhia ṭhenkhatte awmna, Kayah state khawpui, Loikaw-a biak-in chu beih tel a ni a, he hmuna awm mi pali an thi a, mi dang pariatin hliam an tuar bawk.

Maynmar ram hi Buddhist tamna ram ni mah se, Kayah state leh hmun ṭhenkhatah chuan Kristian an tam zawk thung.

Yangon Archbishop chuan a twitter-ah ngenna hi siamin, " Sacred Heart Church-a himna zawnga tlanchhia, pawisawilo te beih tel an ni chu pawi kan tiin kan rilru a na hle a ni," a ti. Hetianga buaina hlaua tlanchhia, a bikin hmeichhia leh naupangte ralthuam hmanga beih zui an ni ṭhin chu tihtawp a hun tak zet tih a sawi bawk.

Bo chuan biak-in, hospital leh school-te chu international convetion-in a humhalh tlat tih a sawi. Tun hnaia Myanmar sipai leh helpawlte inbeihna avangin mi tam tak chu ramhnuai lamahte an tlanchhia tih a sawi a, awmna mumal nei loin ei leh in tur mamawhin an awm mek a ni, a ti