SKorea-ah vaccine la tawh tan mask vuah ngai dawn lo

South Korea sorkar chuan nimin khan thuchhuah siamin, July thla aṭang khan Covid-19 vaccine dose khatna la chin tawh tan pawn chhuahnaah hmai tuamna, face mask vuah a ngai tawh dawn lo tih a sawi.

He ruahmanna hi mipuiten vaccine an lak ṭhat duhna atana tih a ni bawk. Vaccine la tawh hi an ram mipui 7.7% chauh an la ni a, mahse vaccine pek runpui hi kalpui a, September thlaah chuan an ram mipui maktaduai 52 zinga 70% tal chu vaccine pek hman a tum a ni.

Prime minister Kim Boo-kyum chuan nimina coronavirus response meeting neihah hemi chungchang hi sawiin, vaccine dose khatna la chin chu June thla aṭangin chhungkaw inhmuhkhawm pawh phalsak a ni ang, a ti.

PM chuan ram minute 70% chinin vaccine an lak hnuah, October thla velah quarantine dante pawh siamṭhat a nih tur thu a sawi. Health minister Kwon Deok-cheol chuan kum 60-74 inkar zinga 60% chuang chu vaccine la tur hian an inziaklut tawh tih a sawi bawk.

South Korea-ah hian vawiin aṭangin kum 65-74 inkarte vaccine hi pek ṭan a ni dawn a, vaccine lak theihna tur hi line 12,000 chuang siam a ni.

Nikum December thla khan SKorea hian Covid vaccine dose maktaduai 44 leina turin company palite chu inremna a lo siampui tawh a, kumin February thla aṭang khan two-dose vaccination campaign hi a kalpui ṭan a ni.