Russia eptu hruaitu thubuai dang pathum siam belh leh

Russia ram eptu hruaitu, jail-a tang mek Alexei Navalny chuan investigator-ten a laka thubuai dang pathum siam belh leh a ni tih an hrilh thu a sawi.

Langsar taka President Vladimir Putin sawisel ngamtu, Navalny chuan thilsualtia an puhna a pung zel tih sawiin, an puhna thar hi investigator 20 chuangin an chhui tih a sawi bawk.

Kum 44 mi, Navalny chuan pawikhawihna lian tham chhuitu, Investigative Committee aiawhte chuan Anti-Corruption Foundation a dina sum thawhten ruboah leh, judge laka mawi lo taka chea puh a nih thu a sawi niin a tarlang. Hei bakah hian non-commercial organisatwion din leh, Russia mite chu ram tana an tih tur neihte pawh ti duh lo tura fuihah puh a ni bawk tih a sawi.

Kumin January thla khan Navalny hian Russian mi haustaten President Putin tana an sak nia a sawi, Black Sea palace chungchang a chhuina chu Youtube-ah a tichhhuak a, mi maktaduai 116 chuangin an thlir tawh. Mahse Putin chuan he palace hi a ta a nih loh thu a sawi thung.

Nikum khan Navalny hi nerve agent hmanga hrai a nih hnuah hun eng emaw chen Germany-ah enkawl a ni a, January thla khan an ramah kirin, Moscow a thlen veleh airport aṭangin man nghal a ni. A thubuai lo neih tawhah kum hnih leh a chanve tang turin hrem a ni. A tan hnu hian thubuai dang eng emaw zat siam belh sak a ni leh tawh bawk.