Biden leh Putin-ten Geneva-ah summit nei dawn
U.S. president Joe Biden leh Russia president Vladimir Putin-te chuan a ṭum khatna atan Geneva, Switzerland-ah June 16 hian summit an nei dawn tih White House chuan Thawhlehni khan a sawi.
Ram hruaitute hian U.S. leh Russia inkara thawhdunna ṭha an neih chhunzawm zel theih dan ngaihtuaha innhmuh an tum an ni.
Joe Biden hi US President-a thlan tlin a nih hnua Putin nena an inhmuh vawi khatna tur a ni. Biden hi June thlaa Europe-a neih tur, Group of Seven Summit leh NATO Summit Brussels,Belgium-a neih pahin Putin nen hian inhmu tura beisei a ni.
Russia chuan ram hruaitu pahnihte an inhmuh tur thu hi a sawichiang tawh bawk. Thuchhuah a siamah, he hunah hian Russia-US inlaichinna leh thawhdunna ṭha zawk siam dan tur te, khawvel huap ngaihven tling thil hrang hrang te, coronavirus leng mek do let dan chungchangte an sawidun dawn a ni, a ti.
Russia foreign minister Sergei Lavrov leh U.S. secretary of state Antony Blinken-te chu kar hmasa khan Iceland-ah an inhmu tawh bawk a, hei hi President pahnihte summit neih tur atana lo inbuatsaih lawkna nia sawi a ni. Official-te chuan ram pahnih inkar boruak dahṭha in rilru inhawng taka inbiakna neih an hreh loh thu an sawi.
White house chuan U.S. national security advisor Jake Sullivan leh Russia security council advisor Nikolay Patrushev-te pawh Thawhṭanni khan Geneva ah inhmuin, meeting hlawkthlak tak an neih theih thu a sawi bawk. Meeting zawha ram pahnihten thuchhuah inṭawm an siamah, U.S. leh Russia inremlohna awm te sutkian a nih theihnan te, khawvel tana innghahna tlak an nih theih nan hmalak an rel tih an tarlang.
US leh Russia hian thubuai an nei chho ve reng a, Ukraine, cybersecurity, human rights leh U.S. inthlan chungchanga buaina chungchangahte inhmuh thiamlohna an lo nei tawh a ni.
President Biden kaihhruai US sorkar chuan Russia nena thawhdunna ngelnghet tak an neih theih a beisei thu a sawi. Russia lamin a tarlan danin, hun rei tak aṭanga an lo urlawk tawh, Russi-US summit neih hi April 13-a Biden-a'n telephone hmanga Putin a biak ṭuma a rawt a ni tih a sawi.