US-a puitling zatve ten Covid vaccine la kim tawh : White House

White House chuan Thawhlehni khan U.S. mipui cheng zinga puiling zat ve chuan Covid-19 vaccine an la kim tawh tih a puang.

"United States-a puitling 50% chuan vaccine an la kim tawh e" hri leng dona kawnga mellung pawimawh tak an phun thu White Houes senior adviser on Covid-19 response, Andy Slavitt chuan a sawi. January 20-a sorkar thar a din tirh kha chuan vaccine la hi 1% chauh an la nih thu a sawi nghal bawk.

US hi Covid-19 hri vanga thi tamna ber ram ni mah se vaccine semchhuah kawnga khawvel hmahruaitu a ni mek thung. Nikum December thla aṭanga mipui nawlpui tana vaccine pek chhuah ṭan a nih aṭangin kum 18 leh a chunglam zingah mi maktaduai 130 dawnin vaccine an la kim tawh a ni.

President Joe Biden chuan an rama puitling 70% te hnenah July 4-ah chuan vaccine dose khat tal pek hman a tum. State pakua chuan an state-a puitlinga 70% chu vaccine hi an pe tawh a, state 25-ah chuan puitling 50% in an la tawh bawk a ni.

Food and Drug Administration-in kum 12 leh a chunglamte tan Pfizer-BioNTech siam Covid-19 vaccine pek theih an nih hnuah tleirawl maktaduai nga dawnin vaccine dose khatna hi an la tawh bawk.

Mipuiten vaccine an lak duhna turin state, sumdawnna hmun leh pawl hrang hrangte chuan vaccine late tan lawmman hrang hrang an siam. Vaccine la te tan hian a thlawna ei tur pek te bakah, airline flight a thlawna man theihnate an siam. Ohio state-ah chuan vaccine late chu USD maktaduai khat man theihna lottery ticket pek an ni.

US-ah hian Pfizer-BioNTech vaccine chu hman lar ber niin, dose maktaduai 155 chuang pek chhuah ani tawh. Moderna siam vaccine pawh dose maktaduai 122 dawn pek a ni tawh a, one-dose vaccine Johnson & Johnson siam chu dose maktaduai 10 chuang hman a ni tawh bawk.