Afghanistan President atan Ghani lalut

Afghanistan President nilai Mohammad Ashraf Ghani chu a term hnihna atan Thawhṭanni khan thu tiamtira lakluh leh a ni. President term hi kum 5 chhung a chelh leh dawn a ni.

Ghani hi Afghanistan chief justice Sayed Yousuf Haleem­ chuan Kabul-a Presidential Palace-ah a lalut a ni. President lakluh inkhawmah hian Ghani khingpui Chief Executive Officer Abdullah Abdullah pawh a tel. Ghani hian thu tiamtira lakluh a nih hnuah an ramin inthlan an zawh fel tawh thu sawiin, an rama mipui zawng zawngte tan he sorkar thar lo piang leh hi an sorkar a nih ve vek thu a sawi.

Afghanistan President lakluhna inkhawmah hian ramdang mi sawm bik eng emaw zat an tel. U.S. Special Representative for Afghan Reconciliation Zalmay Kha­lilzad, Commander of NATO's Resolute Support Mission and U.S. forces Gen. Austin Scott Miller leh China, Saudi Arabia, India, France, Germany, Canada, Italy leh ram hrang hrang aṭanga ambassador-ten an telpui bawk.

Nikum September 28 khan Afghanistan president thlanna hi neih a ni a, mahse khawl lam fel loh avangte, vote tihchingpen leh candidate-te lungawi loh avangin result puan hun hi Independent Election Commission (IEC) chuan hun rei tak a tihkhawtlai phah a ni.

February 18 khan inthlan result hi puan a ni ta a, Ashraf Ghani chuan vote tlaa 50.64% a hmu a, a khingpui Abdullah Abdullah chuan 39.52% a hmu thung. President inthlanna neihah hian candidate mi 18-an awm a, vote nei mi maktaduai 9.6 an awm bawk. Inthlanah hian vote maktaduai 2.7 vel a tla a, mahse thil dik tawk lo a awm nia sawi a nih avangin vote mtd khat dawn hnawl a ni. Vote tla zinga mtd 1.8 chauh chu pawma chhiar a ni.

US sorkar chuan Taliban nena inremna an lo siam tawh angin, Afghanistan-a US sipai a dahte chu Thawhṭanni aṭang khan a lachhuak ṭan. Inremna an ziahah hian US chuan ni 135 chhungin Afghanistan-a a sipai awm zat, 12,000 chu 8,600 ah tihtlem a remti a ni. Inremna an siamah hian Afghanistan sorkar erawh a tel ve lo a, mahse Taliban chu a hrana inbiakna neihpui ve leh a tum a ni.

 

US hian kum 2001 September thlaa al-Qaida firfiakten US an beih hnuah US sipaite chuan Afghanistan-a Taliban thuneihna chu an paihthlak sak a, awmhmun an khuar zui nghal bawk. Mahse Taliban-te hian intuai thar lehin, kum 2018 aṭang khan an ram chhung hmun tam zawkah chet lain pawikhawihna pawh an thlen zing hle. Afghanistan-ah hian firfiakte nena an inbeihnaah US sipai 2,400 chuangin nunna an chan tawh a ni.