HK media tycoon Jimmy Lai thla 14 tang turin hrem
Hong Kong media tycoon, huaisen taka China sorkar sawisel ngam Jimmy Lai chu kum 2019, October 1-a phalna nei loa punkhawmna huaihawta puh a nih chungchangah thla 14 tang tura hrem a ni.
Kum 73 mi, Jimmy Lai hi kum 2019 vek, August 18 leh 31-a Hong Kong-a democracy tundin phuta kawngzawhnaa a tel avangin activist dang pakua nen thla 14 tang tura hrem a lo ni tawh bawk a, nikum December thla aṭang khan jail-ah a tang tawh a, bail-a chhuah a dilna hnawlsak a ni bawk.
Kum 2020-a Hong Kong-a hman tura China-in national security law a siam hnuaiah Lai hi thubuai pathum siamsak a ni tawh a, heng zingah hian ram dang nena inthuruala puhna pawh a tel.
Nimin khan judge Amanda Woodcock chuan Lai hremna thar pek hi a puang a ni. Activist dangte pawh hremna hi pek an ni ve leh bawk.
Jimmy Lai hi Hong Kong-a pro-democracy movement thlawptu langsar tak a ni. Clothing industry aṭanga hausa a ni a, a hnuah media lam luhchilhin Next Digital a siam a ni. Next Digital hian Apple Daily tichhuakin, Hong Kong leh China hruaitute sawiselna an tichhuak fo ṭhin. A hausakna hi USD tluklehdingawn 1.2 hu vel nia chhut a ni. Tun thla tir khan thuneitute chuan Lai bank account leh Next Digital-a a share, 71. 26% chu khawih let theih lohin an hrek sak a ni.