China-in Nepal tan Covid-19 vaccine dose mtd 1 pe dawn

China president Xi Jinping chuan Nilaini khan Nepal ram tan Covid-19 vaccine dose maktaduai khat an pe dawn tih Nepal president Bidya Devi Bhandari a hrilh.

Nepal-a China ambassor chuan hemi chungchang hi twitter-ah tarlangin, Nepal leh China President-te telephone-a an inbiaknaah, President Xi Jinping chuan Nepal-a hri darh zel tur venna kawnga a puihna atan China chuan vaccine a pe dawn tih a hrilh a ni, a ti.

Nepal foreign ministry chuan, ram hruaitute hian ram pahnih inkara thawhdunna ṭha te, Covid-19 kaihhnawiha inthlunzawmna ṭha neih dantur te an sawidun tih a tarlang bawk. President Bhandari chuan China hruaitu hnenah hian a hmaa anti-Covid vaccine dose 80,000 an lo thawn tawh avangin lawmthu a hrilh bawk. China President pawhin Nepal-in Covid-19 an donaah theihtawp chhuahpui intiamin, vaccine semchhuah kawnga ṭanpui turin Nepal chu ngaihtuah hmasaka an neih tur thu a sawi a ni.

Nilaini khan Nepal-a political party hrang hrangte leh Chinese Communist Party chuan Covid-19 chungchangah virtual meeting an nei bawk a, Nepal hotute chuan an hlutin, Covid-19 hmanrua mamawhte an pek avangin China sorkar hnenah lawmthu an sawi. China hian Nepal tan oxygen concentrator 650, oxygen nasal cannula 20,000 leh oxygen face mask 20,000 a pek tur thu a lo puang tawh bawk.