China President-in Wuhan tlawh

China president Xi Jinping chuan nimin khan coronavirus, Covid-19 hri darh ṭanna Hubei province-a Wuhan khua a tlawh. Hei hi January thla hri a darh ṭan hnua Wuhan a tlawhna hmasa ber a ni. 

Hri darh zel tur venna atan hian January thla tawp lam aṭang khan Wuhan leh Hubei pro­vince-a khaw dangte pawh khar an ni a, lut leh chhuak turte pawhin thuneitute hnen aṭanga phalna an lak hmasak a ngai a ni. Hetianga khar a nih hi hri darh zel tur venna kawngah awmzia a nei hle nia hriat a ni a, China-ah hian he hri leng mek kai zat hi a tlahniam sawt tawh hle. 

President Xi hian military official, commu­nity worker, police, damlo leh khawpuia cheng mi ṭhenkhatte a kawm kual a ni. Wuhan khawpuiah hian Covid-19 kai thar zat a tlakhniam tak zel avangin China sorkar chuan hri kaite enkawlna tura makeshift hosptial 16 a siam zinga 14-te chu Thawhṭanni khan a khar ta. Hubei provine bikah hian Pathianni leh Thawhṭanni khan he hri kai thar an awm lo nia sawi a ni. Hemi rual hian tha thlah loin, hri darh zel tur venna kawngah theihtawp an chhuah chhunzawm zel a ngai tih Communist Party of China’s (CPC) Politics and Law Commission secretary-general Chen Yixin chuan a sawi. 

Report thar berah chuan nimin thleng khan khawvel pumah Covid-19 kai hi mi 114,530 an awm tawh a, heng zinga mi 4,028 hian an thihpui tawh a ni. Hetih lai hian he hri kai, enkawl dam tawh chu mi 64,266 an awm tawh bawk. 

Enkawl mek zingah 40,465 chu an dinhmun ngaihtuahawm lo niin, mi 5,771 dinhmun erawh a ṭha lutuk lo nia sawi a ni thung.