Iran-ah Covid-19 vanga zu in mi 27-in thih phah

Tunlai hri leng mek, Covid 19 laka inven nan zu a ṭha tia social media lama thehdarh a nih hnuah, Iran-ah chuan hri leng laka invenna atan tia zu an in nasat avangin mi 27-in an thih phah.

Heng thi zinga mi 22-te hi Iran-a Khuzestan khuaa cheng an ni a, midang 7-te hi Iran hmarchhak lam Alborz khuaa cheng an ni thung. An zu in hi dan phal loha zawrh a ni a, taksa tana hlauhawm khawpa tam an in nia sawi a ni. 

Iran-ah hian zu hi khap a ni a, mahse muslim sakhua vuan lotu minority ṭhenkhat tan  khap a ni lo thung. Khuzestan-a Jundishapur medical university thupuangtu chuan zu in vanga damdawi-ina dahluh zat hi mi 218 an awm mek thu a sawi.  

Alborz deputy prosecutor Mohammad Aghayari chuan thite hi dan loa zu zawrh an in nasat vang niin a sawi a, heng zu inte hian social media kaltlangin tunlai hri leng tihdamna atan zu a ṭha ber tih chungchang an hriat aṭangin, zu hi dam nan an in zui ta vak nia a hriat thu a sawi a ni. Zu (Methanol) in tam emaw mihring taksaa a luh tam emaw hian mitdelna, thin (Liver) chhiatna leh thihna a thlen thei a ni. Iran-ah hian Covid-19  kai hi mi 7,161 an awm tawh a, he hri vanga thi hi 237 an awm tawh bawk.