Finland Police-te'n an PM ṭukṭhuan eina man chhui chiang

Finland police-te chuan an ram prime minister Sanna Marin-te chhungkuain an tukṭhuan eina manah sorkar sum an hmang nia sawi chungchang chu an chhui chiang mek tih an sawi.

Iltalehti chanchinbu-in a report danin, PM Marin hian thlatinin Helsinki, Kesaranta-a official residence-a tukṭhuan eina man euro 300 la ṭhinah an puh. Marin erawh chuan dan a bawhchhiat loh thu leh, PM hmasate tihdan ṭhin a nih thu twitter kaltlangin a sawi thung.

PM chungchang enfiah tura ngenna thehluh a nih hnuah, Finland police te chuan Zirtawpni khan public-office bawhchhiatna chungchang ni theia an ngaih avangin an chhui chiang dawn tih an sawi a ni. "Prime minister tana hamṭhatna dan siam zingah tel lo mah se, PM hian a eitur man ṭhenkhat chu a ṭhing let a ni," tiin police thuchhuak chuan a tarlang.

PM Marin chuan an puhnate chhangletin official thila senralte chu a ma mimala a siam ni loin, Prime Minister Office lam siam a a nih thu a sawi. "Prime minister ka nihna angin ei leh in man chungchangah hian inrawlhna ka nei lo a, thuthlukna siamna kawngah ka inrawlh heklo. Ka hna ka zawm khan Kesaranta-a ka chen chhung chuan a huam tel tur thu min hrilh a, hei hi ka hmaa prime minister te tihdan ṭhin pawh a ni " tiin a sawi.

Marin chuan official hnen aṭanga thuthar leh kaihhruaina chungchang a dawnte chu a zawm mai ṭhin tih sawiin, mimalin engmah a lei ngai lo a, Prime Minister Office-a thawkte kaltlanga lei vek an ni, a ti.

2019 aṭang khan Marin hian thuneihna hi changin, an ram mipui thlawpna pawh a dawng ṭha ṭhin hle. Hripui leng an thunun hneh avang leh Europe ram zinga hri kai tlem ber zingah an tel avangin a kaihhruai centre-left ṭangrual sorkar chuan fak a hlawh hle a ni.