Vietnam khawpui lian bera chengte Covid-19 test vek dawn

Vietnam sorkar chuan an rama khawpui lian ber leh mipui tamna ber, Ho Chi Minh khawpuia cheng, mi maktaduai 9-te chu hri darh zel tur venna atan Covid-19 test a neih sak vek dawn.

Vietnam-ah hian tun hnaiah hri leng hi a hluar chho leh a, kar liam ta khan official-te chuan Covid-19 hri inthlak danglam hlauhawm tak hmuhchhuah a ni tih an sawi. He hri chi tharah hian India leh UK-a lo hmuhchhuah tawha hri inthlak danglam ang a awm ve ve a, inkaichhawn a awlsamin boruak aṭang pawhin kai theih niin an sawi.

Sorkar chuan hri darh tur venna atan rang taka hma lak a ngai tih sawiin, hri chi thar hmuh chhuahna, Ho Chi Minh-ah chuan test runpui hi neih a tum a ni. He khawpuia Christian Mission-ah hri hi an rawn darh chho a, mi 125 in an kai tih hmuh chhuah ni tawhin, khawpui chhung hmun danga a darhna chhan pawh he hmun aṭang hian nia sawi a ni bawk.

Khawpui chhunga chengte hi test vek tum ni mah se, an testing rate hi ni khatah 10,000 a nih avangin, test vek tur chuan thla li chuang hun an hman a ngai dawn a ni.

Ho Chi Minh khawpuiah hian nimin aṭang khan social distancing dan pawh hman nghal a ni a, dawr leh restaurant-te kharin, sakhaw thila punkhawmna neih khap a ni bawk. Mi 10 aia tam punkhawm khapna lo siam tawh bawk, mi panga chinah tihtlem leh tum a ni tih sorkar chuan a sawi.

Vietnam rama hri kai hmuh chhuah tawh hi 7,000 chuang niin mi 47 in an thihpui tawh a ni. Hri kai zinga a zahve dawn hi kumina hmuh chhuah an ni. Nikum kumtira hri len tirh lam khan rang taka hma la nghalin, ramrite a khar vek a, ram pawn lam aṭangin an ram mi leh sate bak luh a phal lo a, anni pawh hi inkhunghran tir nghal zelin test a neih sak leh vek a ni.

Covid-19 vaccine pawh pe chhuak tahwin, an ram mipui 1% chuan a dose khatna an la tawh.