Egypt leh Israel-in inkahhai chungchang sawidun

Egypt foreign minister Sameh Shoukry leh Israel foreign minister Gabi Ashkenazi te chu Pathianni khan Cairo, Egypt-ah Gaza Strip a inkahhai puan chungchang leh Israel-Palestinian inkara inremna kalpui chhunzawm dan turte an sawidun.

Minister-te hian ram pahnih inkara inremna an siam bawhzui tura hmalak intiamin, Palestinian hotute inkar fel hlei thei lo pawh chinfel dan tur an dap tur thu Egyptian Foreign Ministry thuchhuak chuan a tarlang.

Israel-in Gaza Strip a beihna a thiltih chhiat thawmṭhat hna thawh nan Egypt chuan US dollar maktaduai 500 a pechhuak dawn a ni.

Ashkenazi hian inkaihhai an puan aṭanga ni 10-naah Egypt hi a tlawh a ni.

Israel foreign minister-in kum 2008 hnua Egypt a tlawh lehna hmasa ber niin, 2016 a Shoukry-a'n Israel a tlawh ṭum khan, kum 2007 hnua Egypt foreign minister-in Israel a tlawhna hmasa ber a ni bawk.

Israel leh Hamas-te hi ni 11 chhung inbeiin, an inbeihnaah Palestinian 248 leh Israel mi 12 in nunna an chan hman a ni.

Cairo-a meeting-ah hian Shoukry chuan inkaihhai kalpui a nih chhunga boruak zangkhai leh ṭha zawka kalpui dan tur ruahmanna siam an tum thu a sawi. Ram pahnihte inkar buaina chin fel dan awlsam leh daih rei ber tur chu Palestinian mipui te dikna leh thuthlukna dah pawimawh sak a nih thu a sawi.