WHO-in Covid variant-te Greek hming vuah sak
World Health Organization (WHO) chuan Covid-19 hri leng meka hri chi thar hmuhchhuahte chu an hming phuahin, Greek hming a vuah sak
WHO chuan UK, South Africa, Brazil leh India rama variant hmuhchhuah tharte chu Greek hming pek vek an ni tih a sawi.
UK variant chu Alpha, South Africa chu Beta, Brazil chu Gamma leh India variant chu Delta tiin an hming a vuah a, hei hi awlsam zawka hri leng chhinchhiah theihna atana an ruahman a nih thu WHO chuan a tarlang. Variant dang hmuh chhuah leh an awm a nih pawhin Greek alphabet indawt dan angin hming vuah zel a ni ang.
India sorkar chuan variant B.1.317.2, nikum October thlaa India rama hmuhchhuah "Indian Variant" hming an pek chu a lo sawisel tawh a, mahse WHO chuan official-in he hming hi a vuahsak lo a ni.
"Variant thar hmuh chhuahna ramte chu kan hmehbelin kan dem tur a ni lo," tiin WHO Covid-19 technical leader, Maria Van Khrekhove chuan a sawi a, variant hrang hrangte nasa zawka chhui chian a ngaih thu leh, a darh zel tur venna atana scientific data pawh inhrilh hriat thuai a ṭul thu a sawi.
Covid variant-te hi Greek hming pek an nih avang hian scientific hming an neihsa tawh chu thlak a ni dawn chuang lo. Greek-a hawrawp awm zat, 24 aia tam hi hmuh chhuah anih chuan hming dang vuah dan tur hi ngaihtuah ala ni leh ang tiin Kherkhove chuan a sawi bawk.
"B.1.1.7 tih chu a thlak dawn kan ti lo, mahse ṭhenkhat tan awlsam zawka an sawi mai theihna turin ṭanpui kan duh a ni, mipui punkhawm nikhuaa awlsam taka variant ṭawngkam khata kan hriat theihna tur a ni" tiin Covid variant-te hming pek an nih chhan a sawifiah. He hming thar an vuah hi hmang lar turin media mite pawh a chah a ni.
Thawhṭanni khan scientist-te chuan UK sorkar hnenah an ram chuan coronavirus Indian variant/delta thawh thumna an tawng chho leh dawn tih an hrilh a, Delta hi Apha (UK variant) aiin a darh chak zawk nia an hriat thu pawh an sawi bawk.