Bangladesh-a Rohingya raltlante'n lungawi lohna lantir

Bangladesh-a Rohingya raltlante chuan Cox's Bazar region aṭanga Bhasan Char thliarkara sawn an nih avang leh, an awmna thar hi a him tawk lo nia sawiin lungawi lohna an lantir. An camp tharah hian an khawsak pawh a hrehawm hle niin an sawi bawk.

Nikum December thla aṭang khan Bangladesh sorkar chuan Bhasan Char-ah raltlante hi a sawnchhuak ṭan a, mi 1,00,000 sawnchhuah a tum zingah 18,000 chu sawn an ni tawh a ni. An sawnna hmun hi a him tawk lo a, cyclone tleh fona hmun nia sawi a ni. Mahse hei hi Bangladesh sorkar chuan a pha thung a, he thliarkar hi a him ṭha a, Cox' Bazar-a refugee camp aiin raltlante awmna hmun siam pawh a ṭha zawk niin a sawi thung.

Rohingya raltlan zinga a tam zawk hi kum 2017-a Myanmar sipaite beihpui thlak avanga tlanchhia an ni. Nikum December 4 aṭang khan thliarkarah hian sawnchhuah ṭan an ni a, raltlante chuan an awmna hmun sawn remti tur hian vauna leh kutthlakte an tawk niin an sawi. Tun hnaia he camp aṭanga tlanchhia, Cox'z Bazar lama let tum mi 49 chu man an ni tawh.