China-in fa pathum chin neih phalsak
China sorkar chuan fa pahnih aia tam neih khapna policy a hman avanga an rama nau piang zat nasa taka a tlakhniam hnuin, Thawhṭanni khan fa pathum chin neih phalsak an ni dawn tih a puang.
Thawhṭannia president Xi Jinping kaihruaia Communist Party of China (CPC) Political Bureau meeting neihah he thutlukna hi an siam a ni. Meeting-ah hian an ramah nau piang thar an tlem zel avang leh, kum upa lam an pun zel avangin hnathawk thei chin an tlem zel chungchangte sawilan a ni.
China hi khawvela mihring tamna ber ram ni mah se, nau piang thar an tlahniam zel a, kum upa lam an pung hle thung. Census hnuhnung ber, kum 2020-a neihah khan China rama mipui zinga kum 60 chunglam chu 18-7% an tling tawh a, kum 2010-a chhiarpui neih ai khan 5.44% in an pung tawh.
Kum 1970 chho aṭang khan mihring pung chak venna atan China hian fa pakhat chauh neih phalna, one-child policy an hmang ṭan a ni. Mahse kum 2013 khan nupa, a tu emaw zawk zawk fa mal bikte chu fa pahnih an neih phal sak. Kum 2016-ah one-child policy chu tihtawpin, nupa tawh phawt chu fa pahnih neih phalsak an ni ta a ni.
May thlaa census data tihchhuahah hian, kum 10 liam ta chhunga China ram mihring punna chu 0.53% a ni. Hei hi census neih hmasak ber, kum 1953 aṭanga kum 10 chhunga mihring punna zat a tlem ber ṭum a ni.
Census hmasa zawk, kum 2000-2010 chhunga mihring punna chu 0.57% a ni thung. November 1, 2020 thlenga China ram mipui awmzat chu tluklehdingawn 1.41178 a ni.