WHO-in China siam vaccine a pawm
World Health Organization (WHO) chuan emergency a hman atan China siam Sinovac COVID-19 vaccine a pawm a, ram dangah pawh thawnchhuah theih a ni dawn.
UN health agency chuan Thawhlehni khan two-shot vaccine pawmpuina hi pein, khawvel hman atana him, sawt (efficacy) leh rintlak tawka ngaih a nih thu a tarlang.
WHO director-general Tedros Adhanom Ghebreyesus chuan Sinovac pawm a ni chu lawmawm a tih thu sawiin, he vaccine hi awlsam zawka dahṭhat theih a nih avangin ram rethei zawkte tan pawh a remchang dawn hle tih a sawi. "Mipui ten awlsam taka vaccine an lak theih nan a ṭangkai dawn a ni," a ti.
Sinovac vaccine hi WHO-in a pawm tak avangin ram hrang hrang pawhin an rama hman tura pawmin an lalut thuai thei dawn a, a bikin international standard regulator nei lo ramten an chhawr zual dawn a ni.
Organization hian emergency-a hman atan Pfizer-BioNTech, Johnson & Johnson leh India, South Korea leh European Union rama AstraZeneca vaccine siamchhuahte chu emergency-a hman atan phalna a lo pe tawh bawk. May 7 khan China siam chhuah Sinopharm vaccine chu emergency-a hman atan pawmin, China siam vaccine WHO-in a pawmpui hmasak ber a ni.
Expert panel rualte chuan Sinovac vaccine chu puitling kum 18 chunglam tana pe tur leh, dose hnihna chu kar hnih aṭanga kar li ral hnua pe turin thurawn an pe. Vaccine la tur hian kum upa lamah bithliah a awm hranpa lo a, data aṭanga a lan danin kum upa lamah pawh vaccine hian hna a thawk ṭha hle tih an sawi.
WHO in emergency-a hman atana pawm vaccine-te chu COVAX-ah chhinchhiah zel an ni. COVAX hi ram rethei ten vaccine an dawn theihna atan hmalatu a ni. Tunah hian, AstraZeneca leh Pfizer siam vaccine chauh chu he scheme kaltlang hian thawnchhuah a la ni.
Khawvelah rualkhai taka sem turin COVID-19 vaccine ṭhahnem tak a mamawh a ni tiin, WHO assisant director general Mariangela Simao chuan vaccine siamtute chu hri leng mek do hneh a nih theihna atan COVAX-ah tel a,an thiamna leh rawtna thawh ve turin a sawm.
Sinovac vaccine hi khawvela territory 22 in an hmang mek a, a hmangtu zingah China bakah Chile, Brazil, Indonesia, Mexico, Thailand leh Turkey pawh an tel.