Thu dik lo thehdarha puh Myanmar Journalist pahnih man
Myamnar sipai court chuan Democratic Voice of Burma leh Mizzima reporter pahnihte chu colonial-era law hnuaiah thu dik lo thehdarha puhin kum hnih chhung lungin tang turin an chungthu a relsak.
Nilaini khan sipai court, Myeik chhim lama awm chuan Democratic Voice of Burma (DVB) reporter Aung Kyaw leh Mizzima News freelance reporter Zaw Zaw-te chu general Min Aung Hlaing-a'n February 1-a civil sorkar a paihthlak hnuah, sipai chetdan duh lohna lantir chungchanga an report pek danah thu dik tawk lo a awm nia sawiin kum hnih chhung lungin tang turin a hrem a ni.
Aung Kyaw hian sipaiten an man lai hi live-in a tichhuak a ni. Aung San Suu Kyi kaihhruai mipui sorkar paihthlak a nih hnu sipaiten DVB journalist an man pathumna a ni. .
Sipaite hian independent media-te hrekin, news organization lian DVB leh Mizzima license pawh an tihtawp sak tawh a, internet leh satellite television pawh an khap tawh bawk.
"Sipai sorkar hian dan dik lo takin Suu Kyi an hreng mek a ni," tiin DVB chuan thuchhuah an siam a, chhuah zalen nghal turin an phut thu an sawi. Myanmar sipaite chet dan chu national leh international law bawhchhiatna lian tak a nih thu an tarlang.
Mizzima chuan Zaw Zaw hi sipai rorelna hnuaia an thawktu man panga a ni tih a sawi bawk. Right to freedom of expression chu thilsual a ni lo a, Mizzima bakah Myanmar-a independent media outlet-te chu zalen taka an awm phalsak turin an phut thu a sawi.
ASEAN monitoring group tarlan danin, civil sorkar paihthlak a nih aṭang khan Myanmar-ah hian journalist 87 man an ni tawh a, journalist 51 chu tantir mek an la ni.
Foreign journalist ṭhahnem tak pawh telin, heng zingah hian US mi pahnih an tel a ni. May 24-a man, Frontier Myanmar managing editor Danny Fenster chu a chanchin, khawi hmunah nge dah a ni leh a dam ṭhat leh ṭhat loh chungchangah pawh information engmah an la dawng lo tih Frontier chuan a sawi a ni.