Brazil ramah lungawi lohna lantirna atan bel khawng ri

Brazil president Jair Bolsonaro-a'n Brazil rama coronavirus darh chak tak a thunun hneh tawk loh avang leh, hri leng do hna a ngaih pawimawh tawk loh avangin mipuiten kawtthlerah bel khawng ri chungin Nilaini khan lungawilohna an lantir a ni.

Brazil-ah hian Nilaini khan hri kai thar 1,00,000 dawn an awm a, mi 2,507 an thi bawk tih sorkar thuchhuak chuan a tarlang.

Inrinni liam ta khan ram chhunga khawpui 16 ah left-wing political party, union leh student association te chuan lungawi lohna an lo lantir tawh bawk.

Brazil khawpui lian ber Sao Paulo-ah chuan mipui sang telin mask vuah chungin khawpui chhunga kawtthler lian ber dang chatin, balloon var lian taka Bolosonaro vampire lem anga cheite chu an pholang a ni.

Rio de Janeiro khawpuiah hian Bolosonaro-a'n kum 2022 inthlanpui neih tura a khingpui lian ber tur ,left wing president hlui Luiz Inacio Lula da Silva thlalak chu presidential sash awrh lai an tarlang bawk.

President Bolosonaro hian a hmain mask leh vaccine-te chu a ring tawk lo tih lo sawi fo tawh mah se, Nilaini khan Brazil mi vaccine la duhte chuan kumtawp hmaa an lak theih vek tur thu a sawi. Hemi tlai hian health ministry chuan June thlaah Covid-19 vaccine dose maktaduai li an dawn hman tur thu a puang leh a ni.

Brazil-ah hian mi maktaduai 16.6 chuangin hri an kai tawh a, official chhinchhiah danin mi 4,65,000 chuangin nunna an chan tawh bawk. An ram mipui maktaduai 46 chuan vaccine dose khatna la tawhin, mipui maktaduai 22.3 in vaccine dose an la kim tawh tih University of Oxford chuan a tarlang.