US-in vaccine Maktaduai 25 a thawn chhuak dawn
United States president Joe Biden chuan Covid-19 vaccine an kawllai aṭangin dose maktaduai 25 chu ram dangah an thawn chhuak dawn tih a sawi.
Ningani khan White House chuan vaccine an sem chhuah tur zinga 75% chu COVAX vaccine sharing programme hnenah an pe dawn a, a bak zawng chu an thawhpui ram dang hnenah an pe dawn tih a puang.
"Hri lengin ram dang a chenchilh chhung chuan America mipuite tan pawh a him dawn bik lo a ni," tiin President Biden chuan a sawi. "United States-in kan rama vaccine pek kan ngaih pawimawh anga ram dangah pawh an kalpui ve theihna atan theihtawp kan chhuah zel dawn a ni," a ti.
Vaccine dose maktaduai 25 zinga dose maktaduai 19 chu COVAX kutah hlan a ni ang a,a bak 25% chu emergency atan leh US thawhpui ramte tan dah a ni ang.
White House chuan dose maktaduai ruk chu Mexico, Canada South Korea, West Bank leh Gaza, Ukraine, Kosovo, Haiti, Georgia, Egypt, Jordan, Iraq leh Yemen bakah United Nations front-line worker-te tan an pe dawn tih a sawi.
President Biden hian vaccine an pekchhuahah hian hamṭhatna engmah beisei let an neih loh thu sawiin, "He thil hi beisei let neia ti kan ni lo a, mihring nunna chhanhim nan, khawvela hri leng tihtawp a nih theihna atana hma hruaina tura kan tih a ni," tiin a sawi.
America ramah hian puitling zingah 63% chuangin vaccine dose khatna hi an la tawh a, kum 12 chinten vaccine hi an la thei bawk. Biden chuan Nilaini khan US Independence day,July 4-ah chuan an ram mipui 70% hnenah vaccine pek hman an tum tih a puang.
Ram eng emaw zatin US hi vaccine thawn turin ngen mah se, tun thleng chuan Mexico leh Canada ram chauhin an la dawng a, an dawn tawh hi dose maktaduai 4.5 a ni. US chuan South Korea-a America sipai awmte tan vaccine thawn a tum tih a sawi tawh bawk.
Preident Biden chuan an rama siam, AstraZeneca vaccine dose maktaduai 60 chu ram dang hnenah thawnchhuah an tum thu a lo sawi tawh a ni. He vaccine hi US-ah hman tura pawm la ni lo mah se, ram tam tak chuan an pawm tawh thung. Food and Drug Administration-in a pawm veleh thawnchhuah theih a ni ang.