Hong Kong pro-democracy activist Chow Hang Tung an man
Hong Kong police-te chuan Beijing-a Tiananmen Square-a democracy thlawptute beih an nih champha vawi 32-na, nimin khan pro-democracy activist Chow Hang Tung an man.
Chow hi kum 1989, June 4-a China sipaiten Tiananmen Square-a nuarte an beihnaa thi te hriatrengna, kumtina huaihawt ṭhintu Hong Kong Alliance-ah vice chairwoman nilai a ni. Phalna loa pungkhawmna huaihawta puhin man a ni.
Hong Kong leh Macau-ah Tiananmen Square-a inbeihnaa thite hriatrengna hi hman a ni ṭhin. Hong Kong-ah chuan June 4-ah Victoria Park-ah mi tam tak an pungkhawm thin a ni. Mahse Hong Kong sorkar chuan nikum leh kuminah punkhawm hi a khap a, Macau pawhin kum hnih chhung punkhawm hi a lo khap ve tawh bawk.
Sorkarin punkhawm khap mah se, Chow chuan a Facebook kaltlangin mipuite chu an theih anga hriatrengna hun hi hmang turin a chah a, an awmna hmun apiangah phone light emaw, bati emaw, electronic light emaw chhi turin a chah.
Nimin zing khan Chow hi a office kawtah man a ni. Man a nih hmaa BBC in a kawmaah, "Man tur hian ka inpeih sa vek a ni. Hei hi Hong Kong dinhmun dik tak chu a ni tawh. Democracy tana i bei a nih chuan man a pumpelh theih loh. Democracy tundin a nih theihna atan a man engpawh pe turin ka inhuam a ni," a ti.