Khawvelah Covid-19 hri kai mtd 6.2 chuang awm tawh

Nimin thleng khan khawvel pumah Covid-19 hri kai mi 62,95,965 an awm tawh a, heng zinga mi 28,64,894 chu enkawl dam tawh niin, he hri vanga thi hi mi 3,74,451 an awm tawh bawk.

Worldometer-in a tarlan dan chuan Covid-19 hi khawvel ram hrang hrang 213-ah a darh tawh a, mahse heng zinga ram 15-ah chuan hri kai an awm leh tawh lo thung. 

Covid-19 kai la awm miah lohna ramte chu- Kiribati, Marshall Islands, Micronesia, Nauru, North Korea, Palau, Samoa, Solomon Islands, Tonga, Turk­menistan, Tuvalu leh Vanuatu an ni. 

Khawvel puma hripui kai enkawl mek mi 30,56,620 an awm a, heng zinga 98% chu dinhmun ngaihtuah awm lo an ni a, 2% erawh an dinhmun a ṭha lo hle thung. 

USA chu Covid-19 hri kai tam berna leh hri vanga thi tam berna ram a la ni chhunzawm zel a, nimin thleng khan hri kai mi 18,39,119 an awm tawh a, thihpui 5,99,867 an awm bawk. 

Brazil chu May thla tawp lam aṭang khan Covid-19 kai tam berna ram pahnihna a ni a, hripui kai mi 5,14,992 an awm tling tawh a, heng zinga mi 2,06,555 chu enkawl dam tawh niin, thihpui mi 29,341 an awm tawh bawk a ni. Russia chu pathumnaah a awm mek a, hri kai mi 4,05,843 an awm a, heng zinga mi 1,71,883 chu enkawl dam an ni tawh a ni. Russia-ah hian hri kai tam mah se ram dang nena khaikhin chuan thihpui an la tam lo hle a, 4,693-in an thihpui tawh a ni. 

Hripui kai nuai chuang awmna hi ram 12 a awm tawh a, chung zingah chuan Iran, Peru leh Germany-te pawh an tel.

Thi tam lamah Brazil chuan France a pel ta a, Brazil-ah hian hrileng thihpui 29,341 an awm tawh a, France-ah hian 28,802 an awm tawh thung. 

Pathianni hmalamah kha chuan France hi hripui leng thihpui tam ram palina a ni a, mahse Brazil hian a pel ta a ni. Thihpui tam ber ram chu USA la niin, USA dawtah hian UK an la awm a, Italy chu thihpui tam ram pathumna niin Brazil hi palina an ni a, France hi pangnaah an awm ve ta thung a ni.