UK-in kum 12-15 inkar tan Pfizer vaccine a pawm
Britain rama damdawi lam thuneitute sang ber chuan Zirtawpni liam ta khan an rama naupang kum 12 - 15 inkar tan Covid-19 vaccine Pfizer/BioNTech siam vaccine hman phalna a pe.
"Naupang kum 12 aṭanga kum 15 inkar tana clinical trial neih chu uluk taka kan enfiah hnuah, Pfizer/BioNTech Covid-19 vaccine chu him leh ṭha tawkah kan ngai a ni," tiin June Raine, Medicines and Healthcare products Regulatory Agency (MHRA) chief executive chuan a sawi.
Dr Raine chuan naupang kum 12 aṭanga 15 inkar vaccine la tawhte hriselna dihmun chu uluk taka an vil tur thu leh, a ṭhat dan leh hnathawh dan kalhmang te an enfiah zel tur thu a sawi a ni.
Naupang tana hman turin vaccine hi pawm ni mah se, Joint Committee on Vaccination and Immunisation chuan vaccine deployment programme hnuaiah dah an nih dawn leh dawn loh chungchangah thuthlukna a siam ang.
UK sorkar chuan nikum kumtawp khan Pfizer vaccine te hi kum 16 leh a chunglam tana hman a lo phalsak tawh a ni.
US pharmaceutical giant Pfizer chuan an vaccine siamchhuah chu kum 12 chunglam tana pek theih a nih thu leh, vaccine te chu 2-8 degrees inkarah thla khat chuang vawnṭhat a nih theih thu India sorkar a hrilh tawh bawk.
Pfizer hian kumin chhungin Covid-19 vaccine dose maktaduai 50 chu India tana thawnchhuah an tum thu leh, India rama an vaccine an thawnluh hma in thu delhkilh tlem azawng an siam tel tur thu a sawi bawk.
US-ah chuan tleirawlte hnenah Covid vaccine hi pekchhuah ṭan a ni tawh a, European Union (EU) member ramte pawhin tun thla chhungin pek an tum bawk a ni.