Ram hruaitu hlui 100-in G7 hnenah ngenna thlen

Ram hrang hranga president, prime minister leh foreign minister hlui 100-te chuan Group of Seven (G7) ram hnenah khawvela Covid-19 hri pui leng mek tihtawp a nih theihna atan ram rethei zawkte hnena coronavirus vaccine pek an nih theihna tura hma la turin an ngen.

G7 summit hi tunkar Zirtawpni hian England-ah neih a ni dawn a ni. G7 member ramte chu US, Britain, France, Germany, Italy, Canada leh Japan an ni. Hei hi hri len hnua summit an neihna hmasa ber tur a ni dawn a, ni thum a awh ang. Summit-ah hian khawvel puma hri leng mek chungchang leh hri dona kawnga hma lak zel dan turte an sawiho dawn a ni.

Ram hruaitu hluite hian G7 hnena lehkha an thawnah, kum 2020-a ram hrang hrangte thawhhona chu a hlawhchham nia sawiin, kum 2021 erawh hunbi thar a herchhuah theih an beisei thu an sawi. "Ram rethei zawkten vaccine an hmuh ve theihna atana G7 leh G20 in an puih hian charity a ni lo a, hri darh zel tur laka an invenna a ni," an ti. G7 hruaitu leh summit-a tel tura an sawm, ram hruaitu dangte chu khawvel puma hri leng dona atana kum hnih chhung chu kum khatah US dollar tluklehdingawn 30 pek remti turin an ngen.

G7 hnena ngenna thehluttu zingah hian Britain prime minister hlui pahnih Gordon Brown leh Tony Blair, UN secretary-general hlui Ban Ki-moon leh African leader hlui 15 an tel.