Myanmar sipai leh tualchhung mite inbeihnaah mi pathum thi
Myanmar chhim lam Kyon Pyaw-ah Inrinni khan Myanmar sipai leh tualchhung mite inbeiin mi pathum an thi tih state media chuan a sawi. Hetih lai hian thil thleng hmutu pakhat chuan inbeihnaa thi hi mi 12 an nih thu a sawi thung.
February 1- Aung San Suu Kyi kaihhruai sorkar paihthlak anih aṭang khan Myanmar ramah hian tualchhung buaina a la chhuak chho reng a, hun rei tak an buai tawh avangin ei leh bar zawnna kawngah pawh nghawng a nei lian tawh hle.
Inbeihna thlena hmun hi Ayeyarwady region chhim lam, Kyon Pyaw-ah niin, khaw mite hian tualchhung venghimtu pawl man tuma sipai 100 chuang kalte chu an theih angin an lo bei a ni. Mahse khawchhung mite hian ralthuam leh mihring an neih tlem avangin hun eng emaw chen an inbeih hnuah an tlanchhe zui nia sawi a ni.
State TV, MRTV chuan inbeihnaah hian civil mi pathum an thi a, sipai eng emaw zatin hliam an tuar niin a tarlang thung. Mahse hei hi tualchhung mite chuan a dik lo tih sawiin, civil mi 12 an thi a, an zingah hian naupang kum li mi a tel tih an sawi. Sipai pakkhat a thi tih an sawi bawk.
Civil sorkar paihthlak anih aṭang khan lungawilohna lantir zinga mi 800 chuang chu sipaiten an that tawh tih monitoring group chuan a sawi a, sipaite leh hnam bil helpawl hrang hrang inkar boruak pawh a ṭha lo chho zel a ni.