George Floyd thihna thubuai kal zelah US-ah buaina a chhuak nasa
African-American George Floyd thih dan duh lohna lantirna kal zelah a ni rukna, Pathianni khan US khawpui hrang hrangah buaina a chhuak nasa hle.
Khawpui 40 dawnah curfew puang mah se mipuite chuan an zawm ṭha duh lo hle a, buaina nasa zawk a chhuah phah a ni.
New York, Chicago, Philadelphia leh Los Angeles-ah chuan duh lohna lantirtute leh police-te an innawr buai a, police lam hian mipui pungkhawm hnawh darhna tur hian tear gas leh pepper bullet-te an hman a ngai hial. Police lirtheite chu halin mi ṭhenkhat chuan dawrte an rawk bawk.
National Guard, tualchhung buaina chhuak atana US reserve military 5,000 lai chu Pathianni khan state hrang hrang 15-ah tirh an ni tawh a, Washington DC-ah pawh dahluh an ni bawk. Washington-ah hian White House bulah mipui pungkhawmin bungruate an hal bakah police officer duty-te chu lungten an vawm a ni. National Guard lam chuan venhimna kengkawhtu chu state leh local law enforcement agency lam an la nih thu an sawi thung.
Denver-ah chuan mi sang chuangin tharum tel loin duh lohna an lantir thung a, Atlanta, Boston, Miami leh Oklahoma City-ahte pawh duh lohna hi an lantir a ni.
May 25 khan Minneapolis-a dawr pakhat hnen aṭangin police-te chuan phone call dawngin black American George Floyd hian dollar 20 lem a pe niin an sawi a, officer mantu chuan a khupin leiah a nghawng nawr betin Floyd hian a thawk theih loh thu sawiin, that lo turin a ngen a, hemi video hi a darh zui a, hemi vang hian US-ah hian 'racism' duh lohna lantirna nasa tak a chhuah phah a ni.
Preliminary autopsy aṭanga a lan dan chuan police officer hian Floyd hi a khupin leiah hian minute 8 leh second 46 a bawh bet a, minute thum chu nikhua a hre tawh lo hial niin medical examiner-te chuan an sawi.
A khup a laksawn hma minute hnih velah hian officer dangte chuan a banah a mar phu a awm leh awm loh an check a, a la awm avangin damdawi-in an panpui nghal a, mahse darkar khat hnuah a thih thu puan a ni ta a ni.