June 14 aṭangin Suu Kyi chungthu an rel dawn

Myanmar court chuan Aung San Suu Kyi thubuai chu karleh aṭangin a ngaihtuah ṭan dawn tih a lawyer chuan a sawi.

February 1-a civil sorkar paihthlak a nih aṭang khan Myanmar ramchhungah lungawilohna lantirin civil disobedience movement kalpui chhunawm zel a la ni a, monitoring group chuan sipaite kut tuarin nawrh huaihawt zinga mi 850 velin nunna an chan tawh tih a sawi.

Suu Kyi hi sipaiten manin an hreng mek a, man a nih hnuah hian thubuai eng emaw zat siamsak a ni tawh. Heng zingah hian nikuma inthlanpui neih lai khan coronavirus kaihhruaina dan bawhchhia leh, phalna nei loa walkie-talkie kawlrua puhna pawh a tel.

June 14 aṭanga thubuai ngaihtuahnaah hian thuhretute pawh koh an ni dawn tih Suu Kyi-i lawyer, Min Min Soe chuan a sawi. Thawhṭanni khan Suu Kyi leh a lawyer hi an inhmu a ni. Hei hi sipaiten house arrest-a Suu Kyi an hren hnuah a lawyer-te nena hmaichhana an inhmuh ṭum hnihna a ni.

Suu Kyi-i lawyer chuan sipai lam hian thubuai ngaihtuah hun hi an sawn hlat zel avangin inbiakpawh a harsat thu a sawi. Hetihlai hian Myanmar sipaite chuan kum 2020 inthlanpuia dik lo taka chea puhin, Suu Kyi-i party, National League for Democracy chu ṭhiah sakah a vau bawk.

Red Cross-in mipuite chhawmdawl hna thawk
Myanmar Red Cross chuan Covid-19 hri leng avang leh, sipai rorelna duh lohna lantir avanga tualchhung buaina thleng mek avangin mi sang tel chu chhawmdawl ngaiin an awm mek tih sawiin, heng mite hi chhawmdawl hna hi a thawk mek.

Ram chhung hmun hrang hrangah mi 2,36,000 vel chu rethei takin an awm mek a, heng mite hian ei leh in tur bakah suma ṭanpui an ngai hle a ni, tiin nimina an thuchhuah chuan a tarlang.

Myanmar Red Cross Society secretary-general Dr Htin Zaw Soe chuan hri leng vanga mi tam takin ei leh bar lama harsatna an tawh laiin, tualchhung buaina thleng leh chuan an harsatna hi a belhchhah niin a sawi. An ramin harsatna a tawh mekah volunteer 2,000 chuan first aid, healthcare leh ambulance service-ah midangte tana inpein an thawk mek a, hetihlai hian volunteer zinga ṭhenkhat chuan sipaite beihna pawh an tuar tel fo niin a sawi.