UNGA President atan Maldives Foreign Minister thlang

Maldives foreign minister Abdulla Shahid chu Thawhṭanni khan 76th UN General Assembly President atan thlan a ni a, vote tla 191 aṭangin vote 143 a hmu pha a ni.

Member 193 awmna, Gene­ral Assembly chuan kumin Sep­tember thla aṭanga UN General Assembly 76th session hruaitu tur hian an thlang a, member pahnih an hai avangin vote 191 a tla. Inthlan chuhtu dang, Afghanistan foreign minister hlui Dr Zalmai Rassoul chuan vote 48 a hmu.

UN General Assembly inkaih­hruainaa General Assembly hruaitu chanvo inchan chhawk­na tur duanah chuan, General Assembly 76th session President hi Group of Asia-Pacific States aṭanga thlanchhuah tura tih an ni.

Shahid hian September thlaa a chanvo thar hi chelhin, UNGA 75th session president, Turkey Volkan Bozkir a thlak ang.

General Assembly President hi secret ballot hmangin General Assembly kaltlangin kumtin thlan ṭhin a ni.

General Assembly-a Presi­dent te hi regional group panga aṭanga thlan chhawk an ni, chungte chu - Group of Asian States, Group of Eastern European States, Group of Latin American and Caribbean States, Group of African States, leh Western European and other States Group-te an ni.

Kum 59 mi, Shahid hi kum 2018 aṭang khan Maldives foreign minister a ni a, kum 2007-2008 inkar khan he din­hmun hi a lo chelh tawh bawk. Kum 2009 - 2014 inkar khan Parliament-ah speaker a ni.

Australia leh United States aṭangin a zirnate zo in, Tufts University-a Fletcher School of Law and Diplomacy aṭangin international relations-ah master degree a zo.