Langtlanga taka kal turin China kan nawr zel dawn : US NSA
US National Security Advisor Jake Sullivan chuan Covid-19 hri lo chhuah dan chhuinaah China chu ram dangte thawhpui ṭha tur leh, langtlang taka kal turin an nawr zel dawn tih a sawi.
White House-a news conference a neihah, Sullivan chuan coronavirus hri chungchangah China thusawi dan apiang chu thlirin an pawm ngawt dawn lo tih a sawi a, he virus data leh information chungchangah China chu zep leh thup nei lo a, langtlang taka thil kalpui turin an phut tih a sawi a ni.
US Secretary of State Tony Blinken chuan Covid-19 lo chhuahna hi thil pahnih awm thei a ni tih sawiin, pakhat chu Wuhan laboratory aṭanga lo chhuak a ni thei a, hemi rual hian he hri hi a rawn thleng ve tawp pawh a ni thei a ni, a ti.
President Biden kaihhruai sorkar chuan he hri lo chhuahna dik tak hi hriatchhuah ngei a tum a ni tiin, Blinken chuan hriat chhuah a ngaihna chhan chu hripui lo thleng leh thei dang laka inven dan tur leh, a do letna kawngah ṭha zawka hma lak theih dan hriat theihna tur a ni, tiin a sawi.
Kar liam ta Inrinni khan US President hlui, Donald Trump chuan America leh ram dangte chu Covid-19 hriin chhiatna nasa tak a thlen avangin China lakah zangnadawmna dil turin a lo ti tawh bawk.