Mali President lailawk atan Goita lalut

Mali President lailawk atan Thawhṭanni khan colonel Assimi Goita chu rinawmna thu tiamtira lakluh a ni.

Kum 37 mi, Mali Presi­dent lailawk thar chuan an ram hma­sawnna tura theihtawp chhuah a tum thu leh, sorkar hmain a lo ruahman lawk angin nakkum Februaryt thlaah inthlanpui felfai leh langtlang taka buatsaih a tiam. Hei bakah hian October thlaah an ram danpui siamṭhat a tiam bawk a ni.

Goita chuan a kaihhruai sorkarin tualchhung boruak ṭha siamna turin pawl hrang hrangte inbiakna a neihpui tur thu a sawi. Goita hian President atana lakluh a nih ni vek hian eptu hruaitu leh minister hlui, Choguel Maiga chu prime minister atan a ruat nghal bawk.

President thar lakluh inkhawm hi venhimna khauh tak hnuaiah buatsaih niin, ram dang hruaitute bakah an ambassador-te pawh tel an awm lo. Hei hi Mali sorkar lailawk kaihruai tura sipai hotu dah an duh loh an lantirna nia ngaih a ni.

Goita hi sorkar hmasaah khan vice president a ni a, mahse May 24 khan civil interim president Bah Ndaw leh prime minister Mocatar Ouane-te chuan cabinet an siksawinaah an rawn lo nia puhin sorkar hi a paihthla a, hun eng emaw chen an pahnih hian sipai hmunpuiah an hreng a, bang tura nawr luih an ni zui ta bawk a ni.