UNSC-in secretary-general-ah Guterres ruat chhunzawm duh

United Nations Security Council chuan UN secretary-general ni lai, Antonio Guterres chu a term hnihna atana he dinhmun chelh chhunzawm turin a duh.

June thla chhung atana Security Council president nihna chelhtu, Estonia UN ambassador Sven Jurgenson chuan council private meeting an neih hnuah, Guterres chuan kum nga dang UN secretary-general ni leh tura an thlawp thu hi a puang. General Assembly hnenah Guterres hi term thar, kum 2020, January 1 - 2026, December 1 thleng secretary-general atana ruat leh turin rawtna a thlen a ni.

Jurgenson chuan June 18 hian General Assemby chuan session neiin, a term hnihna turin Guterres hi an ruat leh dawn niin a sawi bawk.

UN hotu thar tur hian nominate dang an awm loh avangin Guterres hi official candidate awmchhun a ni tih Jurgenson chuan a sawi. Kum nga chhunga UN hotu dinhmun a lo chelh tawhnaah, Guterres hian he hna chelh tur hian a tling tawk hle tih pawh chiang takin alo lantir tawh a ni, a ti.

'Secretary-general hian hna a thawk tak tak tih pawh kan hmu hlawm a, secretary-general ṭha chungchuang tak niin ka ngai a ni," tiin Jurgenson chuan press conference-ah a sawi.

Guterres pawhin UNSC chungah an thlawpna avangin lawmthu a sawi.

Kum 72 mi, Guterres hi kum 2017 khan UN secretary-general pakuana atan thlan a ni. Hemi hma hian kum 10 chhung chu UN High Commissioner for Refugees niin, kum 1995-2002 chhung khan Portugal prime minister a lo ni tawh bawk.