Myanmar-a Kayah state aṭangin mi nuai 1 tlanchhe tawh
United Nations rights expert chuan Myanmar-a Kayah state-ah sipaite beihna avangin mi nuai khat chuang chu himna zawngin an tlanchhe tawh niin a sawi. Nimina thuchhuah a siamah, UN special reporter for Myanmar Tom Andrews chuan, February 1-a sipaiten civil sorkar an paihthlak hnuah mipuite an beih chhunzawm zel avangin Kayah state mipuite chu dinhmun derthawng takin an awm mek a ni, a ti. Mi nuai chuang zet tlanchhiate hi ram hnuaiah te awmin, ṭhenkhat chu an ṭhenawm Shan state-ahte an tlanchhe bawk.
UN chuan sipaite hlaua tlanchhiate hi an dinhmun a ṭha lo hle a, ei tur, in tur, tawmhulna tur ṭhate an mamawh a, damdawi lam enkawlna pawh an mamawh hle a ni, a ti. Heng mite hi ngaihven thuai an nih loh chuan mi tam tak chu ei tur nei lo leh damlohna avangin an thih mai a hlauhthawnawm hle a ni, a ti.