France President Macron hmaiah bensak

France president Emma­­nuel Macron chu Thawhlehni khan an ram chhim lama khaw pakhat, Tain-l'Hermitage a tlawh ṭuma mipui zinga a awm laiin mi pakhatin a hmaiah a bensak.

President Macron hmaia ben a nih lai video hi social media lamah pawh a darh chak hle. Macron hian professional training college for the hospitality industry a tlawh ṭuma mipui kalkhawm zinga pakhat, khaki T-shirt ha chuan chibai a tum laiin ani hian "Down with Macronia" tia auin a hmaiah a rawn bensak a ni. Lal rorelna hnuaia an awm laia France sipai te au hla pakhat "Montjoie Saint Denis" tih pawh a sawi tel bawk.

Macron vengtu pahnih chuan President kutthlaktu hi an man bet nghal a, Macron pawh hi hruai hran nghal a ni . Mahse a hnu reiloteah Macron hi mipui zingah hian rawn inlanin chibai a sem chhunzawm leh nghal a ni.

President bengtu hi tunge a nih sawichian a la ni lo a, a ben chhan pawh hriatchian ala ni lo bawk. He thil thleng vanghian police-te chuan mi pahnih an man tawh.

President chuan a thil tawn avang hian hlauh­thawnna a neih phah lo tih sawiin, mipui pung­khawmte a chibai chhun­zawm zel tur thu leh engmah­in an dal theih loh thu a sawi.

Kum 2016 khan Macron hi economy minister a nih laiin, hard-left trade unio­nist ten labour reform duh lohna an lantir ṭumin artui hmanga beih a lo tawk tawh bawk. Macron chuan a thil tawnte chu thil thleng pangngai ve mai tiin, a hnathawh leh a thil tum tihhlawhtlinna turah a tibuai pha lo tih a sawi a ni.