Suu Kyi-i eiruk thubuai siam sak leh

Myanmar ram hruaitu aṭanga paihthlak, Aung San Suu Kyi chu hren a nih hnuah sipai sorkarin thubuai eng emaw zat a siamsak tawh a, nimin khan anti-corruption commission chuan thuneihna a chan laiin a nihna dik lo taka hmangah puhin, thubuai dang a siamsak leh.

Global New Light of Myanmar chuan anti-corruption commission hian Suu Kyi-i hian a nihna, rank chu eirukna atan a hmang ṭankai tih finfiahna pawh a awm tih sawiin, eiruk thubuai a siamsak tih a tarlang.

February 1-a sipaiten civil sorkar thuneihna an hnehchhuh khan Suu Kyi manin tun thlengin an la hreng zui a ni. Hren a nih hnuah thubuai siam belh sak zel a ni a, heng zingah hian phalna nei loa ram dang aṭanga walkie-talkie lakluh kawlah te, hri leng vanga khuahkhirhna siam bawhchhiaah te, colonial-era secrecy law palzuta puhnate pawh a tel.

Anti-corruption commission-in thubuai a siam thar lehah hian, Suu Kyi chu Yangon chief minister hlui hnen aṭanga dan kalhah sum fai, US dollar 6,00,00 leh rangkachak kg 11 vel dawngah puh a ni. Hei vang hian Anti-Corruption Law section 55 hnuaiah thubuai hi siamsak a nih thu a tarlang.

Suu Kyi ukil-in thu dik lo a nih thu a sawi
Suu Kyi-i ukil, Khin Maung Zaw chuan eirua an puhna chu thudik lo leh awihawm lo tak a nih thu a sawi.

Khin chuan, " Ram rorelnaa a inrawlh zui theih lohna turin hnung lam aṭanga beihna a tawk nasa a, a hming tihchhiat tumna a ni," tiin a sawi. Thubuai an siamsak zelna chhan chu thil pakhat chauh, engmah ti thei loa hrekbeh an tumna a ni, a ti.

Sipai sorkar hian kum hnih chhung ngeia inthlanpui buatsaih leh an tiam a, mahse Suu Kyi-i party, National League for Democracy (NLD) erawh ṭhiah sakah a vau thung. Khin Maung Zaw chuan, "Inthlan hi an buatsaih ngei dawn em tih ka sawi thei lo a, NLD pawh hian an chuh ve thei lo maithei a ni," a ti. Suu Kyi-i chu a thubuaiahte hian thiam loh chantir a nih chuan, inthlan hi chuh phalsak a ni dawn lo tih a sawi bawk.