Ramdang tan US in vaccine dose mtd 500 pe dawn

United States presi­dent Joe Biden kaihhruai sorkar chuan US-a vaccine siamchhuaktu te nen Covid-19 vaccine dose maktaduai 500, ram 100 chuang hnena semchhuak turin inremna an ziak.

President Joe Biden hian ram rethei tana vaccine tam zawk pe chhuak tura nawrna a dawng nasa hle a ni. Vaccine tam zawk an pek chhuah tur thu hi nimin aṭanga neih ṭan, Group of Seven (G7) summit-ah a puan rin a ni bawk. Cornwall, UK-a summit hmang tura a kal dawna media miten khawvel tana vaccine policy a neih chungchang an zawhnaah pawh Biden chuan "Pakhat chu ka nei a, ka puangzar ṭep ang" tiin a chhang.

US hian kumin chhunga Pfizer leh BioNTech vaccine dose maktaduai 200 leh nakkum lama dose maktaduai 300 a pekchhuah turah hlawkna pakhat mah a tel dawn lo tih The New York Times chuan a tarlang.

Covid-19 vaccine-te hi US sorkar chuan ram rethei zawk 92 leh African Union ram hnenah a pe ang.

Kar hmasa khan President Biden hian ram hrang hranga vaccine semchhuak tu pawl-COVAX kaltlangin dose maktaduai 80 pek a lo tiam tawh bawk. Biden kaihhruai sorkar hian an ram Independence day, July 4 hmaa US-a cheng puitling 70% te chu vaccine pek hman a tum. US hian vaccine dose maktaduai 303 siamchhuak chu mi maktaduai 171 chuang hnenah pe tawh. US Centers for Disease Control and Prevention. CDC data tarlan danin, US-ah hian mi maktaduai 140 (42%) in dose hnihna an la kim tawh a ni.

G7 summit-ah hian ram hausa leh rethei zawkten intluk tlang taka vaccine an dawn theih dan tur kawngte ngaihtuah a ni dawn bawk.

US leh UK-ah chuan vaccine la an tam tawh a, hri leng pawh a ziaawm tawh hle. Hetihlai hian hri leng hian ram tam zawk nunphung a la ti buai hle thung a, India leh Brazil-ah chuan miṭhahnem tak an thi tawh a ni.

World Health Orga­nization chuan khawvela cheng mi­puite hnena vaccine pe kim turin dose tlukleh­dingawn 11 vel mamawh a ni dawn tih a sawi.

South America leh Central America lamah hri leng hian zual lam a pan zel avangin Pan American Health Organization chuan Latin America ramah kum 2020-a COVID-19 leng aiin 2021-a hri leng chu a hlauhawm zawk avangin inralring turin a hrilh.