Vaccine la tawh tan face mask vuah ngai dawn lo : Brazil President

Brazil president Jair Bolsonaro chuan an ram mipui coronavirus vaccine la tawh tan face mask vuah a ngai tawh dawn lo tih sawiin, hemi atan hian health minister-in ruahmanna a siam dawn tih a sawi.

Brazil hi US dawta hri leng thihpui tamna ni mah se Bolsonaro hian lockdown leh social distancing a dodal tlat thung a, hri kai bak quarantine an ngaih loh thu a lo sawi fo tawh a ni.

Hetih lai hian health minister Marcelo Queiroga chuan President hian mask hman chungchang zirchiang tura a hrilh thu sawiin, Senate Commission of inquiry hnenah hri laka invenna atan mask chu a pawimawh thu a sawi thung. Hri kaite enkawlna atana hydroxychloroquine hman chungchangah Health Minister leh President hi an ngaihdan a in ang lo bawk. President chuan hydro­xychloroquine hi a fak laiin, Queiroga chuan hri kai enkawlna atan a ṭha ngei a ni tih finfiahna a awm lo niin a sawi thung.

Covid-19 vangin Brazil ramah mi 480,000 chuang an thi tawh a, United states dawta thihpui tam berna ram a ni.

Brazil-ah hian vaccine semchhuah a muang hle a, Senate chuan President hian vaccine supply an dawn ṭhinte tum reng vangin a tikhawtlai em tih a chhui chiang mek.

Brazil-a cheng mipui 23.6% chuan vaccine dose khatna an la tawh a, dose hnih la tawh 10.2% chiah an la awm tih health ministry data chuan a tarlang.