Brazil President mask vuah loh vangin $100 an chawitir

Brazil president Jair Bolsonaro chu Inrinni liam taa Sao Paulo-a motorcycle rally a hmanpuinaah face mask a vuah loh avang leh, Covid-19 inkaihhruaina dan a bawhchhiat avangin US dollar 100 chawitir a ni.

Sao Paulo-ah hian "Accelerate for Christ" tih thupuia hmanga motorcyle rally neih chu President hian a hmanpui a, state health regulation bawhchhiain open face helmet leh mask tel loin lirthei a khalh a ni.

Bolsonaro hian nakkuma Brazil inthlan neih tur inbuatsaihna atan rally hrang hrang a huaihawt fo a ni. Sao Paulo-a rally neih turah hian politics lama a khingpui, Sao Paulo Governor Joao Doria chuan state-in kaihhruaina dan a siam te a zawm loh chuan President hi sum chawitir a nih tur thu a lo sawi lawk bawk. Bolsonaro hi Doria leh governor dangte nen pawh Covid-19 chungchangah an thu a in hmu lo fo tawh. Brazil-ah hian hri vangin mi 4,85,000 dawn an thi tawh a, United States dawta thihpui tamberna ram a ni.

President hian mahni ina tawm leh face mask vuah te hi a lo sawisel tawh a, Covid-19 kaite enkawlna atan chloroquine leh hydroxychloroquine te pawh a fak bawk. Mahes heng damdawite hi hri kaite enkawlna atan a hmantlak loh tih sawi a lo ni tawh thung.

Bolsonaro hian amah thlawptu kalkhawmte hnenah hian Covid-19 vaccine la tawh tan face mask hman a ngaih tawh loh thu puangin, "vaccine la tawhin midang a kai chhawn theihna chhan tur a awm lo" a ti. Hetih lai hian vaccine la tawhte pawh fimkhur taka mask vuah chhunzawm zel turin public health official-te chuan an ngen thung a ni.

President Bolsonaro leh a fapa, congressman Eduardo leh infrastructure minister Tarcisio Gomes te chuan rally-ah hian face mask leh social distancing an zawm loh avangin reais 552.71 ṭheuh chawitir an a ni.