Moscow-ah thla 6 hnua hri kai tam ber ṭum thleng

Russia khawpui, Moscow mayor Sergei Sobyanin chuan Inrinni khan Moscow-ah thla ruk hnua hri kai tam ber ṭum a thlen chhoh leh avangin hnathawh kal laite titawpin, essential service tih loh zawngte mahni ina awm turin a chah.

"Tun kar chhunga coronavirus ṭai darh zel chuan dinhmun ṭha lo takah min dintir a, che chhuak lo thei lo kan ni. Hri darh zel tur chhuchat tur leh mipui nunna chhanhim nan, June 15-19 chhung chu hna thawka chhuah loh kar, non-working week-ah puan a ni," tiin Sobyanin chuan khawpuia hri kai thar 6,701 an awm hnuah a puang a ni.

He thupek hian maktaduai 12 awmna, Russia khawpuia hnathawk te essential worker tiam loh zawng a huam ang. Non-essential worker te chu mahni in aṭanga thawk tura phut an ni lo a, mahse thla tin hlawh an la chhunzawm thei dawn thung a ni.

Mayor hian food court leh infiamna hmun te khar tura an tih laiin, restaurant, bar leh club te chu zan dar 11 aṭanga zing dar 6 inkar chhung khar tir an ni thung ang.

Inrinni kha December 2020 hnua hri kai hmuhchhuah an tam ber ṭum a ni a, hemi ni hian Russia ram pumah hri kai thar 13,510 awm belhin mi 399 in an thihpui a ni.

Hri len tirh aṭang khan Russia-ah hian lockdown khauh tak an kalpui nghal a ni a, mahse thla reilo te hnuah thuneitute chuan khuahkhirhna hi thlahdul chhoin, an ram economy venhim nan leh vaccine tam zawk siamchhuah tuma hma lak an thlan zawk vang a nih thu an sawi.

Russia-ah an rama siam vaccine pali - Sputnik V, dose khat lak chi Sputnik Light, EpiVacCorona leh CoviVac an nei tawh. Ram dang zawng aia hmain vaccine an semchhuak hma a, nikum December aṭangin tualchhungah vaccine semchhuah hna an kalpui ṭan a, mahse vaccine la duh in register erawh an tam lo hle thung. Mipui ngaihdan lak aṭangin, a zahve dawn chuan vaccine lak an tum loh thu an sawi. Russia mipui maktaduai 18 (12%) chuan vaccine dose khatna hi an la tawh a ni.