Israel ṭangrual sorkar thar lalut

Israel prime minister thar Naftali Bennett kaihhruai ṭangrual sorkar chu lakluh a ni a, kum 12 chhung Benjamin Netanyahu-a'n thuneihna a lo chelh tawh chu tihtawp sak a ni ta a ni.

Pathianni khan Parliament, Knesset-ah debate neiin vote lak a ni a, sorkar thar thlawptu lamah vote 60 tlain, a thlawp lo lamah vote 59 a tla a, member pakhat a hai thung. Fiahna an paltlang theih tak avangin Pathianni zan khan Bennett kaihhruai sorkar thar hi lakluh a ni ta a ni.

Prime minister thar, kum 49 mi Naftali Bennett chuan an ram mipui zawng zawng tan a kaihhruai sorkar chuan hna a thawk dawn a ni tiin, education leh health sector siamṭhat chu an dah pawimawh hmasak tur a nih thu a sawi.

Ṭangrual sorkar siam tura inremna an siam angin Yamina party hotu, Bennett hi kum 2023, September thla thleng Prime Minister a ni dawn a, hemi hnu hian Yesh Atid party hotu, Yair Lapid chu kum hnih dang PM a ni ve leh thung ang. Sorkar tharah hian Israel prime minister ni rei thei ber, Benjamin Netanyahu chu eptu hruaitu a ni ve thung tawh dawn a ni.

Sorkar tharah hian party pariat, ngaihdan leh kalphung inang lo tak tak an thawkho dawn a, a ṭum khatna atan rorel lamah hian indepenent Arab party, Raam pawh an tel.

Pathianni zana PM thar lakluh rual hian a minister tur mi 27-te lakluh an ni nghal bawk. Cabinet member tharah hian hmeichhia pasarih an tel a ni. Parliament speaker atan Yesh Atid member, Mickey Levy thlan nghal a ni bawk.

Israel PM thar Bennett hi commando hlui niin, self-made tech millionaire a ni. Kum 2006-2008 chhung khan Netanyahu chief of staff a ni ṭhin. Mahse a hnuah Likud party hi chhuahsain, right-wing national regilious Jewish Home party a zawm a, kum 2013-2019 chhung khan ṭangrual sorkarah minister pawh a lo ni tawh. Ultra-nationalist tia sawi ṭhin a ni a, Israel chu Juda-te ram tia langsar taka sawi ṭhin niin, kum 1967 Middle East War aṭanga Israel-in a luah - West Bank, East Jerusalem leh Syria-a Golan Heights-te chu hmasang aṭanga Juda-te ram tia chhal ṭhin a ni. Palestinian ram din tumna dodaltu niin, kumin February thlaa interview a neihah pawh thuneihna a neih chhung chuan Israel ram inches khat pawh tu hnenah mah hlan a ni dawn lo tih a lo sawi tawh.