G7 ramte'n Covid-19 vaccine dose mtd 870 pek chhuah tiam

Khawvela ram hausa pasarih, Group of Seven (G7) hruaitute chuan summit an neihah Covid-19 vaccine dose maktaduai 870 pek chhuah an remti a, heng zingah a zahve chu kumin chhunga pek chhuah hman tum a ni tih World Health Organization (WHO) chuan Pathianni khan a sawi.

G7 ramte hian WHO kaihhruaina hnuaia awm mek leh khawvela vaccine semchhuaktu pawl COVAX kaltlangin ram rethei zawkte hnena vaccine sem chhuah an intiam tih WHO chuan a sawi a ni.

WHO chuan G7 inpekna lawmawm a tih thu a sawi rualin, vaccine semchhuah tur ṭhahnem tak an neih chhunzawm zel theih nana hma la tur leh, hlawkna nei loa ram dang tana thawn chhunzawm zel turin a sawm nghal bawk.

COVAX hian an duhkhawpin vaccine supply an dawng ṭha lo a,vaccine indaihlohna ti ziaawm a, inkhairual taka an sem theih nan ṭan lak angaih thu WHO chuan a sawi. Vaccine indaihlohna chhawk zangkhai a, hri thar insiam zel tur veng hneh tur chuan G7 leh ramdangten a rang thei ang bera an chanpual aṭanga an pek a ngai dawn a ni, a ti.

"Ram ṭhahnem tak chuan hri darh chak tak an buaipui ṭan leh tawh a, vaccine tel loin an hmachhawn mek a ni. Nunna chhanhim tumin kan intlansiak mek a, mahse intlansiakna felfai tak a la ni thei lo a, ram tam takin an la zawm ve thei lo a ni," tiin WHO Director-General Tedros Adhanom Ghebreyesus chuan a sawi.

"Khawvel inpumkhatna atan leh dinhmun hlauhawma ding mek ten venhimna ṭha an neih theih nana hun pawimawh a ni. Hri leng mek kan do hneh theihna turin, ram hrang hrangten vaccine pek chhuah an tiam anga a taka an chet chhuah nghal a ngai," tiin Vaccine Alliance, Gavi CEO Seth Berkley chuan a sawi bawk.