Wuhan-a graduation ceremony-ah zirlai 11,000 chuang pungkhawm

Khawvel puma buaipui mek, kum 2019 kumtawp lama Covid-19 hri hmuh chhuah ṭanna, China-a Hubei province khawpui Wuhan-ah chuan nunphung a pangngai chho tawh hle.

Hri leng vanga hun eng emaw chen an inkharkhip hnuah khuahkhirhna hrang hrangte thlahdul a ni tawh. Pathianni khan Wuhan khawpuiah hian mass graduation ceremony buatsaih a ni a, zirlai 11,000 chuang telin face mask an vuah tawh lo bakah, social distancing pawh an hmang tawh lo.

China hi Covid-19 hri hmuh chhuah ṭanna ni mah se, hri len ṭantirh aṭanga khuahkhirhna khauh tak a siam nghal avangin hri leng pawh hi an thunun thuai thei nia sawi a ni. Hri kai thar hmuh chhuah pawh an tlem tawh hle a, nimin khan hri kai thar mi 20 awmin, heng zinga 18 chu ram pawn aṭanga lut nia sawi a ni.

Official report-ah chuan China ramah hian Covid-19 hri thihpui mi 4,636 an awm a, an zinga a tam zawk chu Wuhan khawpuia mi an ni.