Israel sipaiten Gaza Strip an bei leh

Gaza Strip aṭangin Palestinian-ten Israel chhim lamah balloon alh an thlawh luh tir leh avangin nimin zing khan Israel sipaite chuan thlawhtheihna hmangin Gaza Strip an bomb leh.

Israel sipaite chuan Gaza City-a Hamas compund leh Khan Younis khaw chhim lam an kap tih sawiin, Gaza aṭanga an beihna chhang let tur hian an inpeih reng tih an sawi bawk.

Gaza Strip an beih chhan hi Palestinian-ten pawikhawihna thlen hmasak vang tih sawiin, Israel ram chhunga balloon alh an thlawh luh tir avang hian hmun 20-ah kangmei a chhuah phah tih an sawi.

Hamas thupuangtu chuan Israel-in an pawl an kap tih sawiin, Palestinian-te chuan an dikna chanvo leh an hmun pawimawhte hum turin huaisen takin an lo dolet zel dawn tih a sawi a ni. Gaza-a beihnaah hian thi leh hliam an awm leh awm loh hriatchian a la ni lo.

Nimin zinga Israel sipaite Gaza Strip an beih hi Israel prime minister Naftali Bennett kaihhruai ṭangrual sorkar thar a din hnua an beihna hmasa ber a ni. Sorkar thar hian Palestinian-te an ram khawpui tura an chhal, East Jerusalem kaltlanga Israel far-right nationalist leh East Jerusalem-a Juda mi chengten kawng an zawh a lo phalsak tawh bawk. Thawhlehni khan kawng hi zawhin, Arab demna thute an aupui a, hei hi Palestinian lam chuan an sawisel nasa hle.

May thla khan Israel leh Hamas-te hi ni 11 zet an inbei a, Israel sipaiten Gaza Strip-a beihpui an thlaknaah mi 256 an thi a ni. Palestinian-ten rocket hmanga Israel an kahnaah Israel mi 12 an thi bawk. He inbeihnaah hian Gaza-a in, office leh dawr 1,000 vel chu an chhe tel a ni. Mahse ram dangte hmalaknain ni 11 an inbeih hnuah May 21 khan inkahhai an puang a ni.