US-ah Covid vanga thi nuai 6 tling tawh

United States-ah chuan Thawhlehni khan Covid-19 hri vanga thi nuai ruk an awm tling ta.

Official-te chuan khawvela vaccine semchhuah chak berna ramah hian nunphung pangngai zawh chho ṭan tawh mah se, America chanchina hripui vanga an dinhmun harsat ber ṭum an tawng tih an sawi.

US-ah hian ramdang aiin hri vanga thi an la tam lawrlak a,hri leng ṭan tirha an do danah sawiselna awm mah se khawvela vaccine pechhuak chak ber ram an ni tawh a ni.

New York-a puitling zinga 70% chuan vaccine dose khatna an la tawh a, an state a khuahkhirhna an hlip fel ṭep tawh tih an sawi.

Thla 15 liamtaa 'stay-at-home' tih thupek lo chhuah tawh tu California chuan Thawhlehni khan 'reopening day' an hmang a, hri leng vanga khuahkhirhnasiam, taksa inkar hlata awm te leh hmun khata mipui awm thei zat bitukte chu an hlip vek tih an puang. "A tawpah chuan kan thleng ta, June 15 hian thawnthu thar kan chuangkai ta, insawrzimna te leh taksa inkar hlata awm ngai ṭhin te chu kan kalpel ta" tiin California Governor Gavin Newsom chuan an rama inkhuahkhirhna phelhna hunah hian a sawi.

President Joe Biden hian US-a cheng puitling zinga 70% chu July 4 ral hmain vaccine dose khatna pek hman vek an tum tih a sawi a, mahse chhim lam state ṭhenkhatah vaccine sem a khaihlak nasat avangin an tum ang hi an tihlawhtling thei lo maithei.

Vaccine la kim tawh ten face mask an vuah a ngai tawh dawn loh rualin public transport, school leh hospital-ah te chuan hman chhunzawn tur a ni.

Nikum December thla aṭangin vaccine semchhuah ṭan niin, kumin April thlaah chuan nitin dose maktaduai li semchhuah ziah ṭhin a ni a, mahse a hma an pha tawh lo hle a ni.

US-a cheng maktduai 174 (52%) chuan an rama vaccine siamchhuah pathum zinga engemaw ber chu dose khatna an la tawh tih official data chuan a tarlang.