Myanmar helpawlin sipai beih titawp

Myanmar sipai nena inbei, Kayah State-a helpawl chuan tualchhung mipuite ngenna avangin sipai an beih chu an titawp rih dawn tih an sawi. Helpawl leh sipaite beihna avang hian chenna in tam tak a chhia a, mi nuai khat chuangin an in leh lo an chhuahsan a ni.

Karenni National Defence Force (KNDF) hi February 1-a sipaiten civil sorkar thuneihna an hnehchhuh hnua civil miten sipai sorkar dodalna tura helpawl an din thar zinga a lian ber pawl a ni. Mahse sipaiten an inbeihnaah civil mi tam takin an tuar tawh avangin mipuite ngenna angin sipaite beih let hna chu an chawl rih dawn tih an sawi. Thuchhuah an siamah mipuite chu sipai sorkar paihthlak a nih theihna tura inlungrual turin an chah nghal bawk.

Court-ah Suu Kyi inlan
Civil sorkara hruaitu, Aung San Suu Kyi chu Thawhṭanni leh Thawhlehni khan court-ah a inlan.

Suu Kyi hi sipaiten hrengin, thubuai eng emaw zat an siamsak tawh a ni. Court-a a chungthu ngaihtuah a nih chungchang hi a lawyer-te chuan an puangzar duh lo a, mahse kum 75 mi Suu Kyi hi a hriselna a ṭha tih erawh an sawi.

Amnesty International chaun Suu Kyi chu chhuah turin Myanmar sipai sorkar an phut a, Myanmar ram buaina thleng mekah Association of Southeast Asian Nations (ASEAN) bloc chu a inrawlh duh loh avangin an dem tih an sawi bawk.