Myanmar sipaite'n khua an hal sak

Myanmar sipaite chuan central Myanmar khuaa tualchhung helpawl nena an inbeih hnuah Thawhlehni zan khan khua an hal a, chenna in ṭhahnem tak kangin mi pahnih an kanghlum niin tualchhung media-te chuan an tarlang.

Hetih lai hian MRTV state television chuan Magway Region-a mi 800 vel chenna, Kin Ma khaw kang chu helho tih niin a sawi thung a, media ṭhenkhatin dik lo taka report-in, sipaite puhchhiat tumin an hmehbel zawk niin a sawi thung. Mahse khawchhung mite chuan helhoin sipaite hi an lo beih let vangin sipaite hian khua hi an hal tih ansawi.

Kin Ma khuaa chenna in 200 vel chu a kangral vek a, in 30 vel chauh kang lo a awm a ni. He khua kang hi NASA satellite fire-tracking system pawhin a record a ni. Kangmei chhuaka thi pahnihte hi kum upa lam, himna zawnga tlanchhe ve thei lote nia sawi an ni.

Kangmei chhuak hi a nasat avangin NASA satellite fire tracking system pawhin alo record a, record aṭanga a landanin kangmei hi Thawhlehni zan dar 9:52 vela thleng a ni. He khuaa cheng tam zawk chu ramhnuaiah an biru mek nia sawi a ni bawk.

Human rights group chuan Myanmar sipaite hian kum 2017 khan Rohingya Muslim-te chenna khaw tam tak an halsak tawh a, hei vang hian mi nuai sarih chu Bangladesh ramah an tlanchhia niin a lo sawi tawh bawk. Mahse sipaite chuan he puhna hi an pha thung a, Rohingya zinga ṭhenkhat chu pawikhawihtu leh khaw haltu niin an puh let a ni.

February 1-a civil sorkar paihthlak a, sipaiten thuneihna an chan duh loh lantira nawrh huaihawtte chunga sipaite chet dan chu khawthlang ram hrang hrangte chuan an sawisel fo tawh a ni. Assistance Association for Political Prisoners chuan tualchhung buaina a chhuah hnuah sipaite kut tuarin civil mi 860 chuang an thi tawh niin a sawi a, mahse sipaite chuan thi zat hi an tarlan ai hian a tlem zawk hle tih a sawi thung.