Japan-in vaccine passport pe chhuak dawn

Japan sorkar chuan July thla aṭangin ram danga zin chhuak tur, Japan mite tan vaccine passport an siam tel dawn tih a sawi.

Sorkar thupuangtu Katsunobu Kato chuan, ram dang tlawh turte tan vaccination certificate hi an siam dawn tih sawiin, certificate hi digital ni loin, paper-based-a siam a ni dawn a, local government-ten an pechhuak thei dawn a ni, a ti.

European Union pawhin digital vaccine passport hi siam a tum bawk a, hetah hian passport neituin khawi hmunah nge vaccine a lak, hri a lo kai tawh a nih chuan eng hunah nge a dam tihte tarlan vek a ni ang.

US pawhin an ram mi, ram danga zin chhuak duhte tan vaccine an la tawh ngei tih tarlanna, special document siam tum a nih thu a sawi tawh bawk. Mahse hei hi Florida leh Texas state chuan an duh lo thung a, vaccine travel document siam chu basic rights palzutna niin an ngai a ni.