'Africa Gandhi' Kenneth Kaunda a thi

Zambia founding president Kenneth Kaunda chu kum 97 mi niin Ningani khan pneumonia vangin a thi.

Kaunda hian kum 1960 chhoa tharum thawhna tel loa an ram zalenna tur suala a beihna avangin "Africa Gandhi" tih vuah a ni.

Cabinet secretary Simon Miti chuan Kaunda hi Thawhṭanni khan military hospital-ah dah luh a ni a, Ningani tlai dar 2:30 khan a thi tih a puang.

Zambia Sorkar chuan an Presidnet hlui Kaunda hi ni 21 chhung sun a ni dawn tih puangin, hemi chhung hian Zambia flag chu a ngul chanve in zar a ni ang a intihhlimna kaihhnawih reng reng huaihawt phal a ni dawn lo a ni.

Kum 1964, October-a Britain aṭanga Zambia ramin zalenna a hmuh hnuah, Kaunda hi President hmasa ber niin kum 27 chhung Zambia-ah ro a rel a ni. An rama nationalist party lian ber, United National Independence Party (UNIP) hotu a ni bawk.

Thuneihna a chan chhung hian zalenna sualtute leh khawvel ramdanga mi hang te intluktlan nana beitute a thlawp hle ṭhin a ni. Mahse a rorelna kawngah a mimal ngaihdana ram a kalpui nasat avang leh eptu party awm a khap avangin an rama a larna pawh a tlahniam hman hle. Kum 1991-a multi party inthlanpui neih hmasa berah khan trade union hotu Fredrick Chiluba a hneh zo ta lo a ni.