Khawvela lunghlu lian ber pathumna Botswana-ah laichhuak

Khawvela lunghlu lianber pathumna nia hriat, diamond carat 1,098 chu Botswana ramah laihchhuah a nih thu Bostwana sorkar leh De Beers-te chuan an sawi.

He lunghlu hi President Mokgweetsi Masisi hnenah Nilaini khan Debswana Diamond Company acting managing director Lynette Armstrong chuan a hlan. South Africa-a kum 1905-a hmuhchhuah 3,106 carat Cullinan stone leh kum 2015-a Botswana ram thoa hmuhchhuah, 1,109 carat Lesedi La Rona, Lucara diamond hmuhchhuahte dawta lian ber a ni.

"Kum 50 chuang hnua Debswana-in diamond kan hmuhchhuah leh lian ber a ni a, kan chhut dan chuan khawvela lunghlu len lama pathumna a ni. De Beers channel emaw state thuhnuaia awm Okavango Diamond Company emaw hnena hralh tur chungchangah thuthlukna kan la siam lo" tiin Armstrong chuan a sawi.

Minerals minister Lefoko Moagi chuan an lunghlu laihchhuah tur hming an la phuah lo tih sawiin, lunghlu hi a sei lam 73mm, a vang lam 52mm leh 27mm a chhah a ni. Sorkar chuan Debswana in lunghlu a hralhna aṭang hian chhiah hrang hrang kaltlangin 80% vel a hmu ve thei dawn a ni.