Kim-a'n US nena inbe tur leh inep turin an inpeih tih a sawi

North Korea ram hotu Kim Jong-un chuan US president thar Joe Biden kaihhruai sorkar nena inbe tur leh, a ṭul pawha inep turin an ram chu a inpeih tih a sawi.

Ningani-a Worker's Party of Korea central committee plenary meeting-ah Kim chuan he thu hi a sawi. North Korea hian a hmain US sorkar tharin inbiakna neihpui tuma hma a lakna chu alo hnawlsak tawh a ni.

US chuan NKorea hi a nuclear programme titawp turin a nawr chhunzawm reng a, mahse NKorea lam hian a zawm duh lo thung. Nuclear test a neih ṭhin avangin United Nations Security Council pawhin economy lama hrekna pawh a lo siam tawh bawk.

Meeting-ah hian Kim chuan an ram zahawmna humhim tur leh ram dang kuta innghat loa hmasawnna kalpuina tura an inbuatsaih a ṭul thu pawh a sawi.

Joe Biden kaihhruai sorkar leh Kim inkar boruak hi a ṭha lo nghal hle a, US inthlan neih hma khan Kim chuan Biden chu 'rukru' tia sawiin, Preisdent tana Biden lakluh a nih hma lawk khan North Korea chuan military parade pui tham tak a buatsaih bawk. April thla khan Biden chuan NKorea chu khawvel himna tiderthawngthei niin a sawi ve bawk a ni.