Brazil-ah Covid-19 vanga thi nuai 5 chuang tawh

United States dawta hri leng tuar na ber, Brazil-ah Inrinni thleng khan Covid-19 vanga thi nuai nga an awm tling tawh a, mithiamte chuan vaccine pekchhuah an tikhawtlai zel emaw social distancing an ngai pawimawh lo emaw a nih chuan hei ai hian an dinhmun hi a la chhe thei tih an sawi.

Brazil-a cheng zinga 11% chiahin vaccine dose kimin an la tawh a, thlasik a inṭan chhoh mai dawn avangin hri lengin zual lam a pan zel dawn niin a lang a, coronavirus variant thar darh zau chak tak thleng mek hian vaccine semchhuak pawh ni se thihpui an pung zel dawn niin epidemiologist-te chuan an sawi a ni.

Health ministry data-a a landain, Covid-19 kai hmuhchhuah tawh 1,78,83,750 aṭangin mi 5,00,800 in an thihpui tawh a ni. Kar liam ta chhung khan chawhrualin nitin hri vang hian mi 2,000 thi ziah ang an ni.

"Vaccine hnathawh tak tak kan hmuh hmain mi 700,000 emaw 800,000 emaw vel kan thih hman ka ring. Variant thar kan hmelhriat chho zel a, Indian variant phei hi chuan min tibuai viau dawn a ni," tiin Brazilian health regulator Anvisa hotu hlui Gonzalo Venica chuan a sawi.

Vecina hian an ram president Jair Bolsonaro chu hri leng a hmachhawn danah na takin a sawisel a, hri dona kawnga ramchhunga thawhhona ṭha awm loh chhanah puhin vaccine, lockdown, face mask vuahte a ngaihthah avangin a sawisel a ni.

Hri leng dona kawnga President hma lak danah lungawi loin, Inrinni khan Brazil mipui tam tak chuan ram pumah lungawi lohna an lantir. Hri vanga thi an tam chhanah Bolsonaro kaihhruai chu mawhphurtuah puhin, President hi bang turin an phut .